الأربعاء، مايو 07، 2008


نظيف لمبارك: شيلنا عادل لبيب علشان تعب أهل الإسكندرية

فرد الرئيس: لا سيبوه دا تعب الحرامية

بدو ان المسافة بين تقييم الرئيس مبارك وتقييم رئيس حكومته

احمد نظيف مسافة كبيرة جدا .وتكشف كواليس

حركة المحافظين الاخيرة الفرق الكبير بين التقييمين .

فاثناء استعراض الرئيس لقائمة المرشحين

لاحظ غياب محافظ الاسكندرية اللواء عادل لبيب.

فسأل نظيف عن استبعاد لبيب

ورد نظيف قائلا: شلناه علشان تعب اهل الاسكندرية

فقال له الرئيس علي الفور: لاسيبوه دا تعب الحرامية.

وهكذا نجا عادل لبيب من الرحيل. وكان نظيف

قد استبعد ايضا محافظ القليوبية المستشار عدلي حسين

من قائمة المحافظين بسبب الانتقال الي محافظة الغربية

وعندما علم الرئيس مبارك بأن نظيف استبعد عدلي حسين

لهذا السبب رفض ان يترك المستشار

موقعه وقال لنظيف: طب سيبوه في القليوبية.
ومن ناحية اخري لايزال قرار اضافة محافظتي

حلوان واكتوبر يلقي اعتراضات عديدة داخل مجلس الشعب

وخارجه. وتوقع بعض اعضاء بمجلس الشعب من المستقلين

ان تتجاوز تكلفة الهياكل الادارية للمحافظتين اكثر

من ملياري جنيه. وان يحدث التقسيم آثارا سلبية

علي حصيلة موارد كل من محافظتي القاهرة والجيزة

علي حد سواء . وينوي هؤلاء النواب اعادة طرح

القضية بمجلس الشعب من زاوية الموارد بلجنة الخطة والموازنة.
وكانت الحكومة قد قررت تجميد نقل الخدمات الجماهيرية

خاصة خدمات التعليم الي بداية الموسم الدراسي الجديد.<

هناك 22 تعليقًا:

appy يقول...

اللى فهمته انه بيشوف قرارت او بيمضى عليها
وبعدين حراميه ايه اللى تعبهم اذا كان هما كلهم فى بعض كده بجد انا مبقتش قادره اصدق انه مش عارف حاجات كتير خلاص جيم اوفر
اما تقسيم المحافظات والهطل بمعنى الهطل ده مش داخل دماغى طيب بتحملوا الدوله فلوس ليه وتغلوا علىالناس ليه والله دى قرارت تجيب الاكتئاب والقرف ما يتجهوا للصعيد وينموه بالفلوس دى
انا تعبت بجد لان الحلول كتي روهما مفيش فايده

وجهة نظري يقول...

طيب شفت في نفس الصحيفه الخبرين دول:

نظيف يقضي إجازته في الغردقة علي يخت رجل أعمال استولي علي منشآت الدولة في مرسي علم أثناء استضافته رئيس الحكومة

و

فرح أسطوري لـ «نسايب» أبوغزالة في العين السخنة بـ30 مليون جنيه

http://www.elfagr.org/TestAjaxNews.aspx?secidMenu=2539

في الخبر الأول: أنا كنت فاكره نظيف بجد، والا أنا علي نياتي أوي؟؟

في الخبر التاني: لا تعليق خالص، ربنا موجود ومش حيسيب حد. دا حتي لو بفلوسهم وكسبوها حلال 100% (طبعا أشك في كده) ميعملوش كده والدنيا جعانه حواليهم. هوا أصلا لو كسبوها بالحلال حيصرفوها كده؟؟ دا الواحد بيستحرم يفرح بـ 100 جنيه ويقولك أديهم لحد غلبان وأهو ربنا ساترها معايا، يقوموا يدفعوا ملايين في ليله زي دي. حسبي الله ونعم الوكيل.

أسف إني خرجت عن موضوعك، بس برضه يظهر إن في صله بينهم، يا الحكومه نايمه يا الحكومه مساهمه في الفساد دا.

Jana يقول...

ايه ده ؟؟؟
يعنى من وجهة نظر الريس
انا حرامية !!!!!!!!!!!!!!!!!!!!!!!؟؟؟؟؟؟؟؟؟؟؟؟؟

Desert cat يقول...

هو الرئيس مغيب مثلا ولا ايه
معقول مش حاسس بحالة الغليان الى الشعب فيها
طيب السادة اللى بينقولا له تقارير مش قالوه له ان الشعب كله دلوقتى بقى تحت خط الفقر ... ثم قرار المحافظتين حلوان و 6 اكتوبر ده لوحده مصيبة الناس مش لاقيه تاكل واللى بينتحر هو واسرته علشان مش لاقيين العيش وهو بيهدر فى الفلوس وكاننا خلاص عندنا تخمة منها
الله لا يسامحهم جميعا

امل يقول...

انا بقالي كام يوم كل اما اجي اعلق عندك التعليق مش بيظهر
كنت عايزة اشكرك على المواقع اللي في البوست اللي فات
جت في معادها بالضبط

la3lahakhier يقول...

حتى انت يا قبو طان
يعنى اعمل ايه ؟ الناس كلها بتتكلم فى السياسة ... هى محتاجة لكلام ..هو مش مفهوم للناس كل حاجة وواضحة ... انا حاسة ان الافلام والماتشات والحوارات السياسية كلها شبه بعض نفس الشكل ونفس الكلام ...نفسى اعمل زى القصة اللى بتقول ان شيخ حضر مباراة ام بعت خادمه اشترى لكل لاعب كرة بدال ماهم يا عينى بيضيع الوقت ده كله على الجرى ورا كورة !!!!!!!!!!!
تحياتى سيدى الربان ودام قلمك فى كل الاحوال

somaa mahaba يقول...

انا ولا كانى دخلت هنا...العمليه مش ناقصه....احنا مسجلين خلقه
ههههههه كان فى مقوله زمان بيقولوها
موارد مصر لا تسمح لاشباع حاجات حرميتها
تحياتى ليك سومه_87

الربان يقول...

Appy

تحياتي

طبعا بيتشاور قبل اصدار القرار الجمهوري بتعيين (س أو ص )...لكن انا
رأيت ان هناك رؤي مختلفه..متضاربة

احمد نظيف يقول المحافظ تعب الاسكندرانية
في رأيي ان المحافظ حين ألغي قرارا للمحافظ الاسبق و القرار كان بيسمح لاصحاب العقارات بأضافة ادوار غير مرخص بها الي العقار...بعد ان يأتي بشهادة من استشاري...و دفع رسوم لخزينة المحافظة....

المحافظ الحالي رأي ان هذا تقنين للمخالفات...و اثبتت الايام صحة راية حين انهارت عمارة الاسكندرية المشؤمة...

من الواضح تاثير رجال الاعمال علي فكر رئيس الوزراء...

أسأل الله ان يهدينا جميعا سواء السبيل
و ان يولي أمرنا من يصلح من أحوالنا.

تحياتي و تقديري...

الربان يقول...

وجهة نظري

تحياتي

طبعا لو تأكد بالفعل من ان رئيس الوزراء قضي الاجازة علي يخت لاحد رجال
الاعمال...اعتقد في رأيي ان هذا تصرف
خاطيء يؤخذ عليه...لانه يجب ان ينأي بنفسه عن هذا...

الموضوع الثاني...المشير ابو غزاله رمز
من رموز هذا الوطن...و هو بكل صدق
رجل مخلص و محب لبلده...
اما أنسبائه...او نسايبه فهو غير وصي عليهم...او علي تصرفاتهم.

أنا في رأيي ان كاتب الخبر جانبه التوفيق في الزج باسم الرجل...

أيضا إذا كان أحد منا معه من المال
لان يدفع مثل هذه النفقات..و امواله
مصدرها معلوم...فهو حر...السفه سيحاسبه الله عليه...ولكن ايضا يجب علي
الدولة فرض ضرائب علي مثل هذه الحالات

أشكرك اخي الكريم علي اضافاتك..و ارائك ...

تحياتي و تقديري

الربان يقول...

Jana

تحياتي

بالطبع لأ.... هز كان يقصد بعض التجاوزات التي كانت تتم في عهد محافظين
سابقين للمحافظ الحالي...

المشكلة في رأيي ...هل اصحاب الاعمال
و اصحاب العقارات المخالفة لشروط المباني ...هل هؤلاء هم اهل اسكندرية
في نظر رئيس الوزراء...
ام ان اهل الأسكندرية هم الغالبية الكادحة....


تحياتي و تقديري

الربان يقول...

Desret Cat

تحياتي

أنا مع حضرتك...لكن هناك ازدواجيه
وضحها و حذر منها الاستاذ عادل حموده
رئيس تحرير جريدة الفجر...و بالمناسبة
هو كان رئيس تحرير جريدة المساء الحكومية و بلغ السن القانونية للمعاش

يقول في نفس عدد الجريدة...:


والحقيقة أن ما يجري في مصر هذه الأيام الصعبة والحرجة يثير كل ما توصلنا إليه من علامات الاستفهام والتعجب والدهشة.. نحن أمام سلطتين لا سلطة واحدة.. أمام سياستين لا سياسة واحدة.. أمام جيلين في الحكم لا جيل واحد.. أمام سكتين لا سكة واحدة.. سكة سلامة وسكة ندامة.. سكة تؤمن بقبلة الحياة وسكة تصر علي رصاصة الرحمة.

سكة يؤمن بها الرئيس ويحذر من غيرها.. وسياسة ينحاز فيها لغالبية الشعب.. ورسالة بهذا المعني لا يكف عن إرسالها كلما سنحت الفرصة.. آخرها في خطابه بمناسبة عيد العمال.. وسكة أخري تصر عليها الحكومة ولجنة السياسات ورجال أعمالها الشبان.. وسياسة ترتمي بسببها في أحضان الأثرياء.. ورسالة تؤكد لهم فيها أنها لن تتغير مهما كانت الظروف والضغوط.. وآخرها بثها علي الهواء مباشرة جمال مبارك في حواره مع التليفزيون المصري.
ــــــــــــــ

اصبحنامشتتين ذهنيا...و فعليا...
لا أجد ما اقول الا دعاء الله عز وجل
ان يصلح امرنا كله....و يحفظ مصر
و أهلها من كل سوء.

تحياتي و تقديري

الربان يقول...

آمل

تحياتي

معذرة لحضرتك...

و اشكرك ...و سعيد ان المواقع التي وردت في البوست الماضي كانت ذات فائدة.

تحياتي و تقديري.

الربان يقول...

la3lahakhier

تحياتي

بالفعل حضرتك عندك حق...الكل مستاء
و بينفث عن حزنه...من خلال الكتابه.

لكن اسمحي لي ان اشكرك علي الدعابة الجميلة التي في قصة الشيخ الذي ارسل
خادمه لشراء كرة لكل لاعب في المبارة
هههههه.

يعني كرة لكل مواطن....يمكن تتحل..هههه.

تحياتي و تقديري

الربان يقول...

somaa mahaba

تحياتي

خلاص يا افندم...سنمحو اسمك من سجلات
وزارات مصر كلها...لانك دخلت المدونة برجلك اليمين..ههههههه.

ربنا يلطف بمصرنا و اهلنا و شعبنا
و يجعل مصر سخاءً رخاءً ، آمنه مطمئنة.


تحياتي و تقديري

L.G. يقول...

لالالالالالا وألف وخمسائة ألف لا
المحافظ الحالي زفت طين بجد اسفة ولكن ده أقل ما يقال بجد يخرجك عن أدب الحوار بمسافات لو كنت من اسكندرية حتلاقي نفسك بتدعي عليه 100 مرة في اليوم
وحكاية العمارات
المحجوب كن بيقنن الرشاوي بدل ما بتدخل جيوب الموظفين بالأحياء خلاها في تجميل المدينة لأنه عارف انه كان حيخبط دماغه في الحيطة لفساد المحليات
والمحافظ الذي يتشدق بتدقيقه روح ميامي حتلاقي شارع لا يتعدى 5 متر عرض به عمارة اتبنت في أقل من سنة عشرين دور والله عشرين دور وحجبت الشمس تماما عن العمارة المقابلة لأحد أقاربي تخيل شقة لا تدخلها الشمس نهائيا
ده كداب والله كداب كداب حسبي الله ونعم الوكيل
تعالى اسكندرية وشوف الحفر والبلاط اللي بيغيره وهو سليم حسبي الله حسبي حسبي الله ياربان محافظ اسكدنرية أقول ايه بس روح شوف نفق قناة السويس شوهه وعمال يبعتر فلوس على أندية الكورة
لأ حرام
عن نفسي بدعي عليه
أييوة بدعي عليه لأنه مفتري

nonoymm يقول...

السلام عليكم
لا تعلييييييييييييييييييييييييق
عاااااااااااااااااااااااااااا
حسبي الله ونعم الوكيييييييييييل

الربان يقول...

L.G

تحياتي

اشكرك كل الشكر علي التوضيح...و اهل مكة ادري بشعابها...و لا ابالغ ان قلت
لحضرتك انني كنت اتمني و انتظر تعليق علي الموضوع من اهل الاسكندرية لانهم هم
الأدري بها من واقع معايشتهم اليومية.

لهذا انا كنت متحير ...و في بداية الموضوع قلت ان الموضوع محير....

تحياتي و تقديري

الربان يقول...

nonoymm

تحياتي

اوجزتي و انجزتي... فعلا حسبنا الله و نعم الوكيل.



تحياتي و تقديري

klmat يقول...

سيدى
السلام عليكم ورحمه الله وبركاته
احييك على كل تدويناتك مش مجامله حقيقى
رائعه وهادفه واسلوب راقى ومحترم

عارف التباين مش بس بين الرئيس ونظيف
بين الرئيس ونفسه
لقد شاهدته وهو بيقول ان الاسعار زادت عالميا ولانستطيع رفع الاجور لعدم وجود موارد منذ اقل من شهر
وبعد اضراب 6 ابريل والدعوه الى اضراب 4 مايو قرر العلاوه .سبحان الله ومش مهم الموارد منين. القرارات كلها مسكنات ومتعارضه مع بعضها ولكسب مؤقت

اما عن عادل لبيب معنى كده ان كل اهل اسكندريه حراميه وانا منهم
من الممكن ان تنهار عمارات للغش فى مواد البناء
تخيل ان معظم ارصفه الاسكندريه تم هدها
واعادتها بشكل اسوا والاولى بحاله جيده
قرار نقل موقف السوبر جيت اثر على الجميع بالسوء القمامه رجعت تانى واذا
كان المحجوب غلطان يتم تعينه وزيرا للمحليات . العشوائيه والمصلحه الشخصيه سماتهم.
اماعن الفرح الأسطوى فوائل الابراشى كان موجود فيه كما ذكر فى الصحافه فى القاهره اليوم بحضور اغلب الوزراء الذين يتغيبون عن مجلس الشعب
طولت عليك بس مواضيعك جذابه وههمه

خالص تحياتى وتقديرى

بنوتة مصرية يقول...

أكيد طبعا أنت بتمزح .. مثل البنت اللي رمت وردة صح ؟
هههههههههههه
رئيسنا الله يعلي مراتبه كمان وكمان قاعد علي شلتى نسوان ولمؤاخذة
بيصرف البلد زي ما أي ست شعبية علي قد حالها بتفكر تروح السوق وتجيب حاجة المحشي .. فطول الوقت بتفاضل بين ورق العنب ولا الكرنب ولا الكوسة ...
وبعدين بعد ما تتعب وتفكر وتستشير جارتها اللي قاعدة علي بابها في الدرب الضيق بالمقابل تمام تقوم تقولها طبعا يا اختي الكوسة أحسن وأرخص .. أصلي إمبارح الكوسة بجنيه ونص وورق العنب بعشرة جنيه ... ههههههههههههههه
ومفيش كرنب في السوق أصلا ...
صباحك فل يا سيداة الربان .. متقدرش أنت تسوق بينا وخلاص بدلا من الريس بتاعنا ربنا يعلي مراتبه كمان وكمان

الربان يقول...

Klmat

تحياتي و معذرة في التأخر في الرد.

اشكرك كل الشكر علي التوضيح...و انا
من محبي الاسكندرية..و احزن جدا حين اراها لا تحتل ما يليق بها من مكانه.

انتم اهل الاسكندرية أدري بها من اي شخص أخر...
و في احد الموضوعات تمنيت ان تدار مصر
بما يعرف بمحلية الادارة...يعني كل محافظة
لها حكومة محلية تأتي بالانتخاب المباشر
من اهالي المحافظة,,,
و تكون كل خطط التنمية نابعة من المحافظة....
عدا بالطبع الخارجية و الدفاع و الداخلية فيكونوا من سلطة الدولة المركزية...

تحياتي و تقديري

الربان يقول...

بنوته مصرية

تحياتي

ربنا يصلح من احوالنا و يكفينا شر
انفسنا جميعا...

في رأيي ، ان الحال لن يتغير بتغيير الرئيس...
بل يتغير بتغيير من هم حول الرئيس.
من الواضح ايضا ان هناك اتجاهان...الاول الرئيس..و الثاني لجنة السياسيات...

تحياتي و تقديري..