الخميس، أكتوبر 22، 2009


 


 


 

 
 

 وصلتني علي الايميل و أحببت

أن أدخل البسمة

إلي قلوبكم....بالرغم من أن

الموضوع يبكي....


 


 

من شعر الشاعر علي سلامة


 

حتي إبليس خاجر الي كندا:


 


 

على باب سفارة كندا
 


 

على باب سفارة كندا.. لمحت ابليس و ف ايده استماره..

بقول له على فين.. قاللي بص .. يا هجره يا اعاره..

يا عم زهقت.. كفرت .. الاقيش معاك سيجاره..

انا انتهيت خلاص .. لا نافع وسواس ولا خناس

ولا ليا عيش وسط الناس..

دي عالم مجرمين.. عندكوا فائض ف الفساد..

في كل البلاد..

ومش محتاجين شياطين .. مليش عيش ف دي البلاد..

....



بقالي سنين عاطل .

و انتوا بتعرفوا تقلبوا الحق باطل..

و تسلكوا القاتل .. و تمشوا ف جنازة المقتول..

ومفيش مشاكل..



يا عم ده انا بقيت أوسوس بالمقلوب..

و أقول للحرامي .. كفايه بقى .. توووووب..

انت ايه . لوحدك هاتعمل كل الذنوب..

و أنا ابليس أشتغل واعظ .. ولا كمساري ف اتوبيس..



يا عم ده انا زمان

كنت استنى حد ينسى يسمي وهو بياكل لقمته..

دلوقتي كل اكلكم ملوث .. و بصراحه الواحد

خايف على صحته..

ده مفيش ضمير اساساً عشان اموته..

و كل واحد بمزاجه .. خربانه ذمته..



يا عم ده كل حاجه اتسرقت..

وكده الأجيال الجديدة م الحراميه أتظلمت..

يا راجل ده من كتر ما لطشت معايا..

خرجت ف مظاهره مع الناس اللي بتقول كفايه..

و برضه ......... مفيش فايده


  

هناك 19 تعليقًا:

همس الاحباب يقول...

هههههههههه
حتى ابليس طفش من افعالنا
عنده حق بصراحة لان شيطان الانس بقى اشد فتكا من شيطان الجن
ولا حولا ولا قوة الا بالله
تحياتى

rovy يقول...

ازيك يا ربان ؟
ادعوا الله ان تكون بخير حال

عنده حق يطفش من البلد و من اللى شايفه و من افعال الناس و نفاقها
ربنا يرحمنا برحمته ..
هههههه ايه ده .. تصور انا قلت عنده حق على مين ؟؟ ابليس !!! يا لطيف اللطف يارب

حسبنا الله و نعم الوكيل

تحياتى

salwa يقول...

السلام عليكم الاخ الربان
ده مفيش ضمير اساساً عشان اموته
انها تختصر كل المشاكل التي تقع بها الامة
و لا يصلحها الا مخافة رب العالمين
ادراج قيم كالعادة
سلام

كيكى عوووووو يقول...

انا عارفها
اصلا الراجل دة تحفة فى كتابته والقائه

أم أحمد المصرية يقول...

اخي الفاضل
اولا كيف الاحوال
ثانيا كلمات علي سلامة فكرتني بالبيت القائل
كم ذا بمصر من المضحكات و لكنه ضحك كالبكا

NilE_QueeN يقول...

مش عارفه اقول ايه

ابليس قال كل حاجه

تأثير الفراشة يقول...

ياااه ، أهى دى بقى الكوميديا السوداء ، فعلا الشرور من أنفس الناس أكبر بكثير من وسوسة ابليس

اللهم الهمنا رشدنا و قنا شر أنفسنا يارب العالمين

أشكر حضرتك على البوست المميز

تحياتى لحضرتك

واحد من العمال يقول...

زيارتى الأولى
وسعدت وأستمتعت بهذه الزياره وبعد اذنك مش حتكون الاخيره
وخد شوف القصيده فيديو بصوت وصوره الشاعر على سلامه فى هذا الرابط علشان تنورنا
http://pahepkz-awy.blogspot.com/2009/05/blog-post_16.html

ودمت بخير

الربان يقول...

أخي العزيز خالد

تحياتي

أعتذر عن التأخير في الرد

ان النفس لامارة بالسوء الا من رحم ربي
ابليس بقي تلميذ....هههههه.

تحياتي و تقديري

الربان يقول...

أختي الفاضلة Rovy

تحياتي

أعتذر عن التأخير في الرد

الحمد لله ان بخير و اشكرك علي السؤال و ارجو ان تكوني حضرتك و الاسرة بالف خير.

للاسف ان غالبيتنا ترك للنفس الامارة بالسوء الحبل علي الغارب...و نسي ان لكل أجل كتاب و من ثم سؤال و ثواب او عقاب...

نسأل الله السلامة للجميع.

تحياتي و تقديري

الربان يقول...

أختي الفاضلة Salwa

تحياتي

أعتذر عن التأخير في الرد

فعلا لا قانون ينفع و لا زجر ينهي...و السلامة فقط لمن آتي الله بقلب سليم...
و نهي النفس عن الهوي.

نسأل الله ان نكون جميعا من هؤلاء بفضل من الله و نعمة منه.

تحياتي و تقديري

الربان يقول...

كيكي...

تحياتي

أعتذر عن التأخير في الرد

ان شاء الله تكوني بالف خير...

للاسف لم استمع اليه من قبل...تقصير مني
لكن القصيدة ببساطتها و معانيها الجميلة تدخل الي القلب....

أشكرك و لك تحياتي و تقديري

الربان يقول...

أختي الفاضلة الاستاذة أم أحمد

تحياتي
أعتذر عن التأخير في الرد

الحمد لله انا بفضل و نعمه...و اشكرك علي السؤال...و ارجو ان تكوني انتي و كل احبتك بالف خير...

نعم ضحك كالبكا...لان شر البلية نا يضحك...و هل اصبحنا نملك شيأ غير الضحك
يمكن يخفف قليلا من الاحتقان و الانفلات.

تحياتي و تقديري لحضرتك يا استاذة.

الربان يقول...

Nile Queen

تحياتي

أعتذر عن التأخير في الرد

فعلا ابليس خلص كل ما يمكن ان يقال..
لان حالنا و تصرفاتنا بيننا اصبحت تشمل كل العيوب و الابتلاءات.

تحياتي و تقديري

الربان يقول...

أختي الفاضلة تأثير الفراشة

تحياتي

أعتذر عن التأخير في الرد

النفس امارة بالسوء...و امارة تدل علي انها كثيرة الامر بالسوء...و من رحمه ربي وقاه السيئات...و السيئات من شرور النفس و الانسياق خلف الهوي.

اؤمن علي دعائك الجميل و اسأل الله ان يستحب لنا...

أشكرك علي مجاملتك الرقيقة و لك خالص التحية و التقدير

حواء يقول...

ازيك ... الحقيقة الدنيا حالها بقى حال الشيطان دلوقت مقدور عليه الا افعال البنى ادمين والضرب من تحت الحزام ووحاجات كتير بتحصل بنستغرب عليها لأنها تفشت وانتشرت كأنها شئ عادى جدا عشان الحياة تمشى وكل واحد ياخد فرصته اللى يقف فى وشك زيحه بأى طريقة اى ان كانت ... ربنا يستر .. تحياتى

الربان يقول...

حواء

تحياتي

الحمد لله انا بخير...كيفك انت؟ ان شاء الله بالف خير...

تمام حضرتك...كل منا يفكر في نفسه فقط
كيف يصعد و يحصل علي الملايين... غير مهم كيف؟ او الثمن...او ممن سيحصل علي هذه الملايين....

ادينا صلاتنا...و صمنا رمضان...لكن القلب واهن بل مريض بداء حب الدنيا
و الشهوات...

تحياتي و تقديري لحضرتك

عاشقه الرومانسيه يقول...

ياماشاء الله
حتى ابليس بيتعلم مننا؟
ياحلاااااوه
هههههههههههههههههه

الربان يقول...

عاشقة الرومانسية

تحياتي

شياطين الانس اشد علي البشر من شياطين الجن... و لا معصوم الا من رحم ربي...

نسأل الله ان يقينا شرور انفسنا و اصدقاء السوء...

تحياتي و تقديري