الخميس، فبراير ٢١، ٢٠٠٨

تحياتي

طالعتنا الصحف اليومية بأخبار لزيادة الاجور و المعاشات ، و هي بدون شك أخبار سارة ، في ظل نار الغلاء التي يكتوي

بها الجميع ، عدا طبعا اصحاب المليارات و الملايين من المحتكريين و الانتهازيين ، و من فقدوا ضمائرهم .

في رأيي أن زيادة الاجور ليست هي فقط الحل ، لان الحل لما نحن فيه ، في رأيي ، يأتي من خلال منظومة اقتصادية

شاملة و متكاملة.... بمعني لا يمكن النظر في زيادة الاجور دون النظر في تثبيت او علي الاقل ترشيد الاسعار ...

يعني ان زادت الاجور مهما زادات فمصير الزيادة الي جيوب التجار و المحتكريين....

زيادة الانتاج هي المدخل الرئيسي و الاهم ، في رأيي ايضا ، لتوفير مستوي معيشي ملائم و مناسب لكافة الاطراف

و الفئات.

التخبط يأتي من قرارات غير مدروسة...و غير متوقع عقباتها ، و التخطيط الشامل المتكامل مفقود في كل الوزارات التي

أتت و التي ستأتي اللهم الا اذا غير الله حالنا جميعا شعبا و حكومة ...و شرح صدورنا الي العمل الصحيح لصالح الجميع

و ليس لفئة ما بعينها...

كيف نثبت الاسعار او علي الاقل يكون هناك ترشيدا لها...زبزيادة الانتاج و بكون العرض أكثر من الطلب....كيف يأتي هذا؟

علي سبيل المثال : الخضروات و الفاكهة....كيف نزيد الانتاجية ؟ باتباع الطرق العلمية الحديثة، و تفعيل دور مراكز البحوث

التي لا تعد و لا تحصي ...مثل مراكز البحوث في وزارة الزراعة...في المركز القومي للبحوث ...في اكاديمية البحث العلمي

في الجامعات المصرية كافة و كليات الزراعة خاصة....نحن لا نشعر بوجود انتاج علمي حقيقي لهذه المراكز...لا اثر عملي

او تطبيقي لها في حياتنا العملية اليومية.

زيادة الانتاج تأتي بتوفير متطلبات الانتاج من بذور و تقاوي و اراض زراعية او مستصلحة...بوجود الاسمدة الضرورية و توفيرها

لكن اين نحن من كل هذا...... البناء يتم علي الاراض الزراعية...و الاراض المستصلحة تباع لبناء كومباوندات سكنية فاخرة

بمئات الالاف من الجنيهات .... الاراضي المستصلحة في طريق مصر الاسكندرية و مصر الاسماعيلية خير شاهد علي ذلك.

الاسمدة...و ازمتها الشهيرة و المعروفة...و بعض الاشخاص الذين يحتكرون بيعها....و توزيعها.... كيف يتم زيادة الانتاج في

ظل كل هذا....

مثال أخر.... من المعروف ان السكن يستنزف حوالي ثلث دخل المواطن المصري البسيط... ماذا يفيد في زيادة الراتب

و اسعار الشقق سواء التمليك او الايجار اصبحت ملتهبة...كيف يستأجر شاب موظف يبدأ حياتي بمرتب جنيهات معدودة

كيف يكون اسرة.... لقد باعت الدولة اراض لشركات بالفدادين استغلوها و بنوا عمارات و ابراج اسعارها لا يستطيع دفعها

الا فئة محدودة من الشعب... الادهي و الامر ان هذه الشركات اشترت و قامت بالبناء بقروض من البنك و بالحصول علي

مقدمات مالية مرتفعة من راغبي السكن...

باعت الدولة متر الارض بثلاثة الاف جنيه لشركات خليجية....الاثر ظهر مباشرة بارتفاع كافة الاسعار للاراضي او الشقق

بجوار هذه المشروعات الجديدة.

كيف نزيد من حجم الوحدات المعروضة للايجار او البيع لعامة الناس و مصانع الاسمنت و الحديد محتكرة للانتاج و تتحكم

في الاسعار ...يوميا سعر جديد....

الحديث يطول و يطول.... و حديثي ليس له هدف الا انها خواطر مصري مهموم بمشاكل بلده مثله مثل ملايين المصريين

الذين احبوا بلدهم و شعبهم و تمنوا ان يروا بلدهم خير بلد علي الارض.

تحياتي و معذرة علي الاطالة.

هناك ٣٣ تعليقًا:

انين الحزن يقول...

الربان

ازيك اخبارك ايه

بس انا موش عارفه اقول ايه غير

ايه الكلام الكبير دا

بس انت عارف انا الحاجه الا مخليني مبسوطه دلوقتي

اني اول تعليق

بس الحاجه تغلي متغلاش بقي ربنا معانا

سلاموووووز ياقمر

خمسة فضفضة يقول...

السلام عليكم ورحمة الله وبركاته

كلنا زي حضرتك مهمومين بمشاكل هذا البلد
وبنعدي ربنا انه يزيح الغمه ويصلح حال هذه الامه عن قريب

آمين

Empress appy يقول...

هو خبر هايل بس اللى بيحتكروا دول اكيد لازم يكون فيه بدايل ليهم وفعلا احنا فاقدين التخطيط الصح
ويا رب بقى الرشوة ولااحتكار ولامحسوبيات تنتهى من البلد دى اصل انا خايفه اصحى الصبح الاقى مفيش ناس فى الشارع وسابوا البلد ومشيوا

أم أحمد المصرية يقول...

صديقي الربان علي فكرة انا متفائلة برغم الهموم فمنها يبدأ التغيير و الناس في مصر النهارده بدأوا يشاركوا و يعبروا اكتر من الاول و لسه خلي الظالمين يزودوا ظلمهم بس حتشوف في الاخر نور الشمس و هو طالع و حتشوف العيش في الافران بدون طوابير و اللحمة في متناول الجميع

Desert cat يقول...

استاذى كيف ننتج ونزيد من الاستثمار وكل يوم يخرج لنا قانون جديد لاستنزاف اموالنا
فمن اين وانا مستأجرة ادفع ايجار كلما انتهت مدة العقد رفع مالك العقار فى العقد الجديد اثنناء تجديد مدة ايجارى ... كيف انتج وافيد وكي يوم فاتورة تالكهرباء فى ازدياد مع ان عدد ساعات العمل لا تزيد عن المألوف .. كيف انتج وافيد وانا ادفع غرامات بحكم محكمة لا اعلم عنها شيئاً ولما تسال انا مش جالى انذار ولا اى حاجه يقولك معلشى ادفع وبعدين اشتكى
وبعد كل ده ازاى انتج وازاى افيد وانا بشتغل علشان اسدد فقط لخزينة الدولة فى المصالح الحكومية المختلفة
احترماتى

Unknown يقول...

بص هى الاجور تزيد من هنا و الاسعار تغلى من هنا الاتنين فى توافق مستمر و اتحاد رهيب ، اللهم شتت شملهم

عصفور المدينة يقول...

لو تتبعت الزيادات في الأسعار لوجدتها تقترب من الضعف خلال العام الماضي فقط فاللهم أغثنا وأنج عبادك المستضعفين من مصيبة الغلاء وغيرها

فرنسا هانم يقول...

عن الاحتكار سألونى ؟؟؟؟؟؟
استاذنا
هو فى حد مودينا فى داهيه الا الاحتكار
احمد العز
خلاص خلاها خل
الحديد وصل 5 الاف جنيه
والاسمنت 440 جنيه
وعجبى
هو فى طاقه نور صغيره اتفتحت بعد احاله عشره من الاسماء اللامعه فى تصنيع الاسمنت الى القضاء
بعد اتفاقهم سويا على رفع سعر الاسمنت
والغريب
بل والعجيب
بل والمشين
ان من بينهم اسمنت القوميه
وهى شركه قطاع عام

الفارس الملثم يقول...

بداية زي ما انت قولت جميل انهم يزودوا المرتبات طبعا ده لو كانت اخبار حقيقة بس السؤال اتزيد اد ايه..

احنا ملاحظين في الكام شهر الاخيرة ان الاسعار خرجت عن نطاق السيطرة وفي سلع اسعارها تضاعفت فعلا ولم تحرك الحكومة ساكنا بما يوحي ليك ان هناك موافقة ضمنية علي الارتفاع ده واللي يؤكد الكلام ده تصريحات حكومية عن ارتفاع اسعار في اوربا وامريكا طيب يا جماعة ادوا الناس ربع اللي بياخدوه في امريكا واوربا مش اقولكم زيهم

انا حاسس ان الحكومة فعلا بتتأمر علي الشعب عشان تحل مشاكلها ولا انتم ناسيين اللي حصل للجنيه وحكاية تعويمه اللي خلت الجنيه يفقد نصف قيمته , انت عارف المشهد الشهير في مسرحية المشاغبين لما يقوله لما تتزنق اقلع هو ده اللي بيحصل الحكومة كل لما تتزنق بتخلي الشعب هو اللي يفك زنقتها

طبعا كلامك صح تماما عن وسائل زيادة الانتاج بس انا شايف المشكلة الاكبر مع النظام المتخبط اللي بيحكم البلد ..

انت تحس ان البلد اشيه بسفينة بيدير دفتها ربان مش عارف ابسط قواعد الملاحة

تقبل مروري

Hoda يقول...

سيدى الفاضل الربان

الاسعار التهمت رواتبنا نحن الغلابه ولا نستطيع ان نعترض ومن يسمع شكوانا تصدق وتآمن بالله علشان يضيفوا الحافز على المرتب ونقبض الاتنين مع بعض قاموا خصموا الشهر دا من الاضافى اه والله عينى عينك كده دون سابق انذار وبنقول ليه بيقوله زياده فى شريحة الاستقطاعات من تأمين صحى ومعاشات وضراااااايب تخيل بياخدوا منا ضرايب اكتر من اللى بنحصل عليه من مستحقاتنا احنا بنتعرض لاكبر عملية نصب فى تاريخنا هدفها اغتيال الوطن وتحويل الشعب الى اعواد قصب تتمايل مع الرياح بينيمونا الحكومه بتاعتنا وتقول لنا هنزودكم وهما بيستهزءوا بعقولنا بس عارف احنا نستاهل اكتر من كده 100 مره ولسه ياما هيحصل لنا خلينا قاعدين نتفرج ونحط جزم فى بقنا

تحياتى

الربان يقول...

انين الحزن

تحياتي و تقديري...

ربنا مع الجميع .. يشملنا برعايته و حفظه.


تحياتي و تقديري

الربان يقول...

خمسة فضفضة

تحياتي و تقديري...

ضاقت فلما استحكمت حلقاتها...فرجت و قد ظننت الا تفرج.

تحياتي و تقديري

الربان يقول...

ِAppy

تحياتي و تقديري...

الاحتكار آفه بغيضة...محرمة شرعا و قانونا....لكن محتاجين يد من حديد تطبق القانون و تنهي الاحتكار.

تحياتي و تقديري

الربان يقول...

أم أحمد المصرية

تحياتي و تقديري.....

عندك حق...لازم نكون متفائلين...لان الغد ان شاء الله افضل من اليوم.

و لا يستطيع أحد ان ينكر ان مصر تتمتع
بقدر كبير من الحرية غير مسبوق...يستطيع
كل منا التحدث بحرية و دون خوف...وهذا
من دواعي الامل في غد مشرق ان شاء الله.

تحياتي و تقديري

الربان يقول...

Desert cat

تحياتي و تقديري...

هي المشكلة هنا ...كما ذكرت حضرتك...
المشكلة في كثرة القوانين...و ايضا في
ضرائب متعددة ..و رسوم اشكال و الوان
و ضمائر خربه في المحليات...كل ذلك يعرقل مشاريع الشباب.. و يطيح بأحلامهم...

تحياتي و تقديري

الربان يقول...

عالية حليم

تحياتي و تقديري...

في رأيي ان هناك سلع اساسية تكون الدولة ملزمه بتوفيرها للشعب..
مثل رغيف الخبز...الزيت...السكر..الشاي...و بعض البقول.

ايضا تحافظ الحكومة علي اسعار بعض الخدمات المقدمة منها مثل الماء و الكهرباء و الغاز....

تحياتي و تقديري

الربان يقول...

عصفور المدينة

تحياتي و تقديري...

الغلاء سيستمر طالما لا يوجد رادع...و لا زيادة انتاج... زيادة الانتاج مع ردع التلاعبين باقوات الناس هو الحل الامثل ، في رأيي ، و الله أعلم.

تحياتي و تقديري...

الربان يقول...

فرنسا هانم

تحياتي و تقديري

فعلا الاحتكار اثر علي حركة البناء..و رفع اسعار الارض و البناء...بل هناك
شركات مقاولات صفت اعمالها ...و بيوت مقاولين اتخربت نتيجة لاحتكار مواد البناء...مع العلم ان الطاقة التي يحصلون عليها مدعمة من الدولة.

تحياتي و تقديري

الربان يقول...

الفارس الملثم

تحياتي و تقديري...

اوافقك القول يا أخي الفاضل، لكن اسمح
لي ان اقول ان البعض يعرف ماذا يريد بالضبط و يحصل عليه...و في رأيي اننا نعيش زمن رجال الاعمال...

تحياتي و تقديري

الربان يقول...

haneen

تحياتي و تقديري...

تماما كما ذكرت حضرتك...و العاملين بالحكومة و شركات القطاع الخاص قبل
قانون الاستثمار ، هم الذين تستقطع الضرائب و الرسوم منهم من المنبع...علي
رواتب لا تتعدي جنيهات محدودة...و لمن لا يعرف هناك ضريبة توقيع تستقطع من الموظف... علي سبيل المثال.
و اصحاب الاعمال و المهنيون و الحرفيون
الكثير منهم اقراراتهم الضريبية غير صحيحة....

تحياتي و تقديري

simple girl.. ..simple dream يقول...

اخى الربان
شكرا عل مرورك على مدونتى ويارب ماتكونش اخر مرة
على فكرة انا شوفت تعليقك عند اكتر من مدون ولقيت فعلا ان تعليقاتك كلها معبرة اوى وبتمس صلب الموضوع ودايما بيكون عندك حق فى جزء كبير من كلامك

سلوى يقول...

كل كلامك مضبوط
الحكومه بتدي باليمين وتاخده بالشمال أضعاف

حسبنا الله ونعم الوكيل

همومك بالبلد هي همومنا جميعا
وتعبيرك عن هذه الهموم أحييك عليه وعلى طريقتك
تحياااااتي

الربان يقول...

simple girl.. ..simple dream

تحياتي و تقديري ، و أشكرك كل الشكر علي مجاملتك الرقيقة.

لك مني ارق التحيات و اطيب الامنيات، و دمت بألف خير.

الربان يقول...

salwa

تحياتي و تقديري...

معظمنا مطحون في الغلاء... و يوم بعد الاخر بتزداد المعاناه للناس.

لكن دائما هناك آمل...في أن يصلح الله أحوالنا...و يفرج كرب المطحونيين و المكتويين بنار الغلاء.


تحياتي و تقديري و أسعدني تشريفك و مشاركتك.

Rania Lelah يقول...

كل مصرى اما بيقعد يفكر فى حال البلد بتصعب عليه و بتعصب عليه نفسة انه مش قادر يعمل حاجة

تحياتى لك

walaa يقول...

اولا دى ان زادت المرتبات اصلا
يبقى وقتها يكون الغلاء اكثر ولك الله يا غلابه
ثانيا فى سؤال هتجن واعرف الاجابه بتاعته الفلوس اللى اتخصخصت بيها الشركات والفلوس الى اللى باع بيها اراضى توسكى
واللى بيبع بيها الاراضى بتاعت كل يوم الفلوس دى بتروح فييييين يا حراميه
تصدق بالله انا قاريت ان قناة السويس بتدخل دخل بس يكفى شعب مصر باكمله
الناس دى هتشبع امتى وهتودى الفلوس دى كلها فييين
مش عارفه
تحياتى ولاء

الربان يقول...

Rania

تحياتي و تقديري....

كلامك صحيح...كل المصريين بيحبوا بلدهم
لكننا يا رانيا لم نترجم الحب الي عمل..
و النتيجة ان بلدنا تسير عكس الاتجاة الاخرون صاعدون و نحن هابطون.

تحياتي و تقديري

الربان يقول...

walaa

تحياتي و تقديري

ما تتحدثين عنه من اموال ربما يكون تم صرفه علي مشروعات فاشلة...لم تؤت ثمارها...بل كانت عبأ علي الدولة في التنفيذ لا بل في التخلص منها ايضا.
جراج ميدان رمسيس ...تم البناء و بعدين الازالة قبل ان يستخدم....تخبط
وعشوائية...

تحياتي و تقديري

بنت الصالحين يقول...

استاذنا الربان
ربنا يبارك في حضرتك علي تحليل المشاكل ومحاولهوضع حلول
ولكن
هل سياتي اليوم الذي يتم فيه تطبيق كافه الحلول لنعيش حياه افضل؟

اتمني ذلك حقا

لنا الله

HeBa يقول...

مرحبا

كل الكلام اللي أنت قلته جميل بس المشكلة في التنفيذ

أكيد كلامك والحلول اللي بتقترحها ممكن تفيد الحكومة ده لو الحكومة بتدور على حلول من أساسه

الحكومة مش عايزة تنفذ أو بمعنى أصح مبسوطة كده

المشكلة إن الطبقة المتوسطة خلاص اندثرت واحنا فعلا ممكن ندخل على مجاعة لإن السلع حاليا ممكن متكونش في متناول عدد كبير من الناس اللي دخلها 400 جنيه مثلا

يعني الناس يا أما تموت يا أما تسرق يا أما تعمل ثورة

تحياتي

Unknown يقول...

عارف الفراشة عندنا فى الشغل كانت اول امبارح حتشد فى شعرها بتقولى اروح يا بنتى اشترى العدس بتاع الفقرا الغلابة الاقى الكيلو بتمانية جنيه

الربان يقول...

عاشقه الفردوس

تحياتي و تقديري...
بين غمضة عين و انتباهتها يغير الله من حال الي حال...

ليبدأ كل منا باصلاح نفسه...بحبه و شفقته للمساكين...باداء الزكاة و التصدق....
عندئذ سيصلح الله حال بلدنا.


تحياتي و تقديري

الربان يقول...

عاليا حليم

تحياتي و تقديري

انا من محبي العدس...احبه بكل اشكاله
من مأكولات...

ربنا يعين الناس...و ياريت القادرين منا يهادو غير القادرين بالعدس و الزيت...و بعض السلع الاساسية... ياريت ...نتراحم فيما بيننا...
نحياتي و تقديري و دمت بالف خير ياعالية.